Ísraelskir filmsdagar í Havnar Bio

Mánakvøldið 13. november kl. 19 setur Annika Olsen, borgarstjóri í Havn, Ísraelsku Filmsdagarnar.

03/11-2017
Jógvan Andersen

Eyal Lampert, sum fyrr hevur arbeitt á ísraelsku sendistovuni í Gana, er virkandi sendiharri í Keypmannahavn, til Benjamin Dagan tekur við sum nýggjur sendiharri. Eyal verður í Føroyum, tá ið Ísraelsku Filmsdagarir verða hildnir í døgunum 13.-15. november.

Annika Olsen, borgarstjóri í Havn, fer at seta Ísraelsku Filmsdagarnar mánakvøldið 13. november í Havnar Bio.

Hóast avmarkað í stødd, so er Ísrael á øllum økjum eitt virkið filmsland.  Sum virkandi ísraelskur sendiharri í Keypmannahavn, vil Eyal Lampert knýta sambond millum tey, sum gera film í hansara heimlandi og spírandi filmsumhvørvið í Føroyum. 

Eyal vísur á, at umframt at víðagitna sjónvarpsrøðin “Homeland” upprunaliga er úr Ísrael, so eru flestu ummælarar beint nú samdir um, at ísraelski filmurin “Foxtrot” fer at verða millum teir, sum verða í uppskoti at vinna Oscarvirðisløn sum besti filmur, ið ikki er amerikanskur. Og hvør veit, um ikki “Foxtrot” verður tøkur at vísa á Ísraelsku Filmsdøgunum í Føroyum næsta ár, sigur Eyal, ið vónar at nýggja afturvendandi filmsátakið fer at hepnast væl.

Filmarnir, sum við enskum undirteksti verða vístir á Ísraelsku Filmsdøgunum í Føroyum, eru umframt áðurnevnda “The Cakemaker”, “A Quiet Heart”, sum Eitan Anner hevur leikstjórnaði, og “Bethlehem”, sum Yuval Adler leikstjórnaði. Allir tríggir filmarnir hava fingið fleiri virðislønir í ymsum londum.

Maigun Solmunde samskipar Føroyaferðina hjá virkandi ísraelska sendiharranum í Keypmannahavn. Umframt Maigun luttók Birgir Kruse frá Filmsfelagnum á fundinum við ísraelsku sendistovuna í Keypmannahavn.

Á myndini síggja vit, v.f.: Philip Blüdnikow, Maja Tjørnelund Sørensen og Eyal Lampert, sum øll arbeiða á ísraelsku sendistovuni í Keypmannahavn.

Kelda: Portal.fo