Ísraelar gleða seg til føroyska sendistovu
Føroyar lata skjótt eina sendistovu upp í Ísrael.
Hesi boðini fingu lógvabrestirnar at runga í Tel Aviv seinnapartin, tá ið Annika Olsen, borgarstjóri í Tórshavnar kommunu, tók lut á einum fundi á ráðstevnuni Muni World í Ísrael, har aðrir 140 borgarstjórar eru.
hesa vikuna.
Innbjóðingin til ráðstevnuna í Ísrael er komin í kjalarvørrinum av seinastu vitjanini hjá Anniku Olsen í Ísrael í februar 2018.
Hesaferð varð borgarstjórin boðin til serligan fund við øðrum borgarstjórum, sum formaðurin í ísraelska kommunufelagnum skipaði fyri. Hann vildi vita meira um, hvussu kommunur í ávikavist Newcastle, Kalifornia og Havn skipa seg. Harumframt var formaðurin í týska kommunufelagnum við í pallborðinum.
Á fundinum seinnapartin hevði Annika Olsen eina framløgu um Føroyar og Havnina og um avbjóðingar fyri framman. Dentur varð eisini lagdur á samstarvið millum land og kommunur.
Á fundinum varð eisini viðgjørt, hvussu kommunurnar virka í mun til landið. Semja var um, at kommunurnar eru tær, sum verða avgerandi fyri menningina í londunum í framtíðini. Tað er í kommununum, at neyðugu samstørvini verða skapt, og sum røkka langt út í heim.
Annika Olsen nýtti eisini høvi at fegnast um, at føroysk sendistova verður stovnað í Ísrael í næstum. Hetta fekk áhoyrararnar at skera í fagnaðarróp.
Kelda: torshavn.fo