Løgreglan, ið royndi at skilja partarnar, brast saman við arabar, sum steinaðu og tveittu ymiskt annað eftir løgreglumonnunum.
Benzi Gopstein, sum stovnaði høgravenda bólkin Lehava (Eldlogi), fylgdist við stuðlum frá Safra Square til Damaskus portrið, rópandi í kór ”Am Yisrael Chai” (Leingi livið Ísrael), ”arabar út” og ”deyði yvir arabar”.
Mótmælisgongan var eitt aftursvar til eitt video á TikTok, sum vísti arabar, sum tilvildarliga ganga og sláa religiøsar jødar.
Mótmælisfólkini steinaðu og tveittu fløskur. Ólætisløgreglan kom á staðið og nýtti nervagranatir til tess at spjaða mannamúgvuna. Løgreglan segði, at eini 20 løgreglufólk vórðu særd í samanbrestinum, íroknað ein løgreglumaður á hestbaki, ið varð raktur av steini í andlitið. Tríggir endaðu á sjúkrahúsi. Í minsta lagi 105 arabar vórðu løstaðir, harav  22, sum endaðu á sjúkrahúsi, upplýsti palestinski Reyði Hálvmánin.
Løgreglan segði, at fleiri enn 50 fólk vórðu handtikin fyri at hava tveitt steinar og fýrverk, lopið á løgreglufólk og annan harðskap undir ófriðinum, sum vardi til morgunin eftir.
Nógvir løgreglumenn vórðu sendir til Jaffaportrið í gamla býarpartinum, eftir tað at eitt fólk til gongu varð álopið. Álopsmaðurin flýddi; fýra mistonkt vórðu handtikin.
Nær við Heródusar portur varð ein jødi í bili álopin í tí at hann royndi at flýggja. Hann varð hann bukaður og eldur settur á bilin.
Eisini tók bardagi seg upp á Mahane Yehuda marknaðinum inni í Jerusalem.
Tá ið tað frættist, at mótmælisfólk savnaðust á Shabbat Square, inni í ultra-Orthodoxa Mea Shearim býlinginum, kom løgreglan á staðið at fáa skil á støðuni. Íbúgvarnir steinaðu løgregluna, við tí úrsliti at tveir løgreglumenn vórðu løstaðir. Eingin varð handtikin.

Kelda: Israel Hayom