Saudiski uttanríkisráðharrin, prins Faisal bin Farhan, sigur, at fáa viðurskiftini í rættlag við Ísrael hevði havt við sær ómetaligan ágóða til økið, men at ein slík semja við kongaríkið er treytað av at framgongd er í friðartingingunum millum Ísrael og Palestina-arabararnar, sigur tíðindastovan AFP.
     Undir "Abraham Semjuni" (Abraham Accords), sum fyrrverandi amerikanski forsetin Donald Trump virkaði fyri í fjør, samdust fýra arabisk lond, UAE, Bahrain, Marokko og Sudan at normalisera viðurskiftini við Ísrael.
     Tó so, bin Fahran, legði dent á, at einhvør avtala við Saudi Arabia var treytað av framgongd í friðartingingunum.
“Eg haldi, at tað, at fáa viðurskiftini í rættlag við Ísrael hevði verið ótrúliga gott fyri økið” segði hann við CNN. “Tað hevði verið ótrúliga gott, bæði fíggjarliga, men eisini sosialt og sæð frá einum trygdarsjónarmiði”, legði hann afturat.
     Hesar viðmerkingar samsvara við tað ið aðrir saudiskir embætismenn hava sagt, og alsamt lagt dent á, at landið stuðlar einari avtalu við Ísrael, men at hetta er treytað av einari friðaravtalu við palestinensiskar myndugleikar, sum førir til ein palestinskan stat.
     Tað sigst at Benyamin Netanyahu forseti og saudiski krúnprinsurin Mohammed bin Salman hava hitst í loyndum í november í fjør, har teir hava samráðst um at fáa viðurskiftini landanna millum í rættlag, men at krúnprinsurin tók seg aftur, orsaka av valúrslitinum í USA. Saudi Arabia avsannar annars at teir hava hitst.

Kelda: Arutz Sheva